التدوينه اليوم عن شي يمكن عادي أو بسيط بس انا فعلا أبغا ادونه لنفسي اولا ولغيري ثانيا
ليوم انا راح يجي اكون نسيت هذي السعاده اللي عشتها ,,
التدوينه اليوم عن أول وضيفه ..
اول وضيفه  كانت بسيطه ولطيفه بس لفتاه بسيطه كان شي أكثر من المتوقع .
وبالرغم اني مااستمريت فيها لبعد المسافه .
بس لسبب ما عطتني دافع اني ايوا اقدر , ايوا لما كنت بالثانوي اقولهم اني راح اكون عندي شركه تصوير او تصميم  ايوا صار
يعني هو صدقا ماصار بس اني دخلت وصرت موضفة في شركه للتصوير ههههههه يعني مو لهدرجه راح تتحقق الأحلام
المهم :
قبل ٣ سنين قررت أني ابدا اشتغل بتصوير المناسبات مثل ماقلتلكم مره اني بعد تصوير زواج صديقتي وبعض زواجات لأهلي حسيت الموضوع شي جميل  وعلى قولتهم لقيت نفسي
وبالرغم من انني كنت اعرف رأي الاسره الحاكمه بالموضوع بس سويت اني القويه وبديت
اشتريت العده والاشياء وحبه حبه  جتني طلبات وبسرعه بدا حسابي يزيد متابعين .. والي اصورلهم يرجعون لي لتصوير اقاربهم بس البيئه تفرض رايها ،،، بسبب مشاكل تصوبر المناسبات من التاخير الى ٣ فجرا وهالأمور اضطريت أترك الموضوع بعد ٦ مناسبات صورتها استمتعت فيها لاخر حد .

بعدها شفت انسانه لطيفه كنت اتابعها من ايام الفليكر كانت موجوده عندي واعلنت انها تبغى مصورين ومصممين لمؤسستها
كلمتها ورحبت بالموضوع وقالتلي انا ابغاك تكونين مصوره مو مصممه لاني حابه يكون شغلك بالتصوير تبع التيم معنا
رحت قابلت ألطف مديره شفتها بحياتي , قد ايش لطيفه .. محترمه ,, سالتها عن طبيعه الشغل قالتلي حاليا أنتي راح تمسكين الحجوزات بالمكتب تقابلين العملاء وتوقيع العقود وهذي الاشياء لما مااكون موجوده ..
بعدها راح نتكلم بخصوص تصويرك للاطفال ,,


وداومت .. في مكتب باباراتزي استديو :


من أول يوم عرفت قد ايش هالأنسانه لطيفه على قد ماأرتكب أغلاط وأكلمها الا انها ترد علي بطريقه جميلة :
أسماء حبيبتي عادي هذا أول يوم لك مو مشكله ,, أسما العميله جدا مبسوطه منك ,, اسما لاتهتمين خلاص
أنا راح اقولها تنتضرك .
هالشي شفته جميل  صحيح بس متى حسيت قد أيش هالأنسانه غير لما توضفت عند غيرها لما توضفت عند مديره بروفشنال في التحبيط وتكسير المجاديف مديره ودك تروح أقرب مكتبه وتشتريلها أبسط كتاب كيف تتعامل مع البشر بشكل عام .
كانت فاهمه الأداره انها مجرد سلطه وتفرضها.

بس روابي ..

روابي كنت أرجع كل ليله من دوامي الثاني محبطه لدرجه البكاء اقول في نفسي الله يسعدها دنيا واخره ..  قد ايش كانت متفهمه ,, كانت اخت بالرغم اني مااستمريت عندها شهرين بس حسيت انها فعلا قريبه ,,
وانك تلاقي انسان يراس عملك بهالشكل يحسسك انك انت جيد انت اساسك جيد واغلاطك هذي مجرد شي عارض وراح تروح كيف يعطيك الثقه اللي تخليك تحس اني انا ابغا احافظ على هالثقه واعطي افضل افضل ماعندي .
انا ماادري هذي البنت هي مثقفه وانسانه واعيه وقرات كثير كيف تدير موسسه صح ولا هي انسانه بالفطره احساسها عالي بالناس وتعرف تزرع الحماس بقلوب موضفينها ,بالرغم من صغر سنها .
أنا كنت موضفه جدا بسيطه بسيطه عندها وتعاملت معي بكل هذا اللطف بالرغم من اغلاطي كيف مع غيري

لحضات لما اشوف سنابها واشوف الناس تقولها صوتك يبينك مغروره اقول اه بس لو تدرون :

هذي المديرة ,
طيب أيش اقولكم عن المكان ؟







 المكان كان جميل كان مكتب اسمه شي وركس SHE WORKS
فكرته ان يكون مكان لأي سيده أعمال عندها بزنس وحابه تدير مكتبها ولها مجالات مثل مكاتب وغرف دورات تدريبة واشيا جميلة
صاحبته أول يوم جت جلست على الطاولة عندي وتسولف معي حبيتها كنت احسبها موضفه زينا طلعت صاحبه هالمكان اللي يفتح النفس  .
,

بعدها تعرفت على بنتين ( مها المعاري + ندى الحربي ) راح أكتبهم لاني ماأبغا أنسى أسماء زميلات أول وضيفة
ألطف من كذا ماشفت :
شفتي اللي تجلسين مع ناس وفجاه تحسين أنه تعرفينهم من زمان الله يسعدهم وين ماكانو كانت الجمعات اللي كلها ضحك  .

الفتره اللي كنت موضفه فيها كانت فتره صعبة من حياتي كنت أمر فيها بمشاكل الوضع الطبيعي اني اكون جالسه في بيتي افكر في مصير حياتي الجاي .
بس هالوضيفه البسيطه الناس الجدد كانت زي رساله من رب العالمين تقولي أن لسا الحياه فيها جمال لسا في ناس تحب وتنحب لسا ياأسماء مو وقت الياس لسا تقدرين توصلين لأماكن جميله وتعطين قد ماتقدرين .
كانت زي البلسم اللطيف اللي تعرفت فيها على ناس بحق لطيفه اخلاق وراقيه بمعنى الكلمة ناس خلوني اشوف جانب من الحياه جميل وساحر .
معرفه الناس معرفه الناس المحترمه الناس اللطيفة مكسب وشي من سحر الحياه .
مشاركة الناس الكلام بكل ببساطه ،، لما تشوف ناس تشبهك بفكرك بأحلامك حاجه جميلة مره مايعرفها اللي يواجهها
ماادري يمكن لأني انسانه اجتماعيه واحب الناس واللمه هالوضيفه شبعت هالجانب عندي
ولكن بعد شهر كنت اداوم فيه دوام متقطع تركت الشغل لسبب واحد الا وهو ( بعد المكان ) والراتب كله يروح عالمواصلات
كلمت روابي وقالتلي شي خلاني احبها أكثر
قالتي تدرين انتي من افضل الموضفين واكثرهم امانه توضفوا عندي وماودي ابد تطلعين كان ودي تكونين معنا , ولما وصلني الراتب وصلني لشهر كامل وانا ماداومت الا كم يوم في الشهر .
انسانه ساحرة بحق .

بعد هالوضيفه توضفت بمكان ثاني  بس ابدن الانطباع الاول للوضيفه الاول قوي وجميل ماخلاني اشوف شي بجمالها
الحمدلله انها كانت وضيفتي الاولى .

 في يوم من الايام كنت اجمع ريال على ريال عشان ابغا لابتوب ولانني وحده كنت متعوده على المكتبي لسنوات عديدة
ماكنت مقتنعه باللابتوب ايوا انا وحده قديمه احس الشغل مايصير شغل الا اذا صار على كمبيوتر مكتبي غبار ادري
المهم شريته اكبر مساحه , افضل معالج , اكبر شاشه
كان لينوفو جميل مره وصدقا مافي شي اسمه تعليق واحمل لين اقول بس ومايشكي من شي
ولانه شغلي كان ايديتنق ومونتاج فيديوهات فكنت احتاج كبرة ..
بس بعدها بسنتين قررت أني اغير ..







 واشتريته بس مو ب ٧ الاف ب ٣٥٠٠ ريال .
اشتريته مستعمل استعمال نضيف من حراج , جلست شهرين ادور على المواصفات اللي ابغاها
معالج ٥
سعه ٥٠٠
اصدرا ٢٠١٢ ومافوق
ومركب فيه قطعة SSD اللي تسرع الجهاز 
.
اسعار هالمواصفات بالرغم من انه قديم الا انها غاليه ووصلت ل٥ الاف
ولاتفكر تكاسر لانه بيقولك حبيبي انت بتاخذ ماك برو
كنت اقول سلامات بعد عيني .
بس لما استخدمته اقدر أقول اني أنا اللي سلامات ..
ولقيت الحب لقيته بعد عيني فديييييته , كان حاطه صاحبه بدون صوره حتى وتواصلت معه وقالي انه مشغول والجهاز استخدمه فقط للافلام بعد ماتأكدت من كل شي أبغاه وسالته عن كل شي ومع ان ٣٥٠٠ كانت كبيره علي وتقدرون كنت اهوز هههه اشتري ولا لا بس غمضت عيوني ودفعت هع
 , كان بالقصيم وأرسله لي فيديكس
كان التواصل من اخوي
فلما وصل مادريت انه وصل . جيت عند اهلي وقالي اخوي تشوفين هذاك الرجال حق لابتوبك هون عن البيعة
جاني احباط مو طبيعي لانها ثالث لاب نضيف افرح فيه ويجي شي يايهون صاحبه او يبيع او يصير شي
جلست على كرسي المطبخ عند امي اتحلطم وامي فديتها مكشوفه جلست تضحك وقالتلي شوفيه فوق بغرفتهم واعطيها ذيك الصرخه وطيران ماادري كيف وصلت هناك
وشفته
شفت اللي اعلن افلاسي ...
صدمة ..

الاحلام  ، كثير صرنا نسمع انه لازم تتبع حلمك كيف ماكان ووين ماكان سواء تماشى مع بيئتك او لا او تطلب فقدان اعز احبابك ، الحلم انك تستعد لكل شي فيه وتتبعه بكل ماأوتيت من قوه .
، بالنسبه لي
كنت مقتنعه تمام الأقتناع أن حلمي اذا راح من ايدي فانا تخليت عنه
بينما ممكن يكون رحيل هالحلم قدر يخبئ لي قدر ثاني اجمل بكثير
على مدى ٦ سنين بعد التخرج
اكتشفت ان الأحلام المفترض انها تجلب لنا السعاده مو التعاسه وفقدان أساسيات حياتنا ، ولما تقابلنا عوائق اسريه او ماديه ضروري نفكر
ونتخطاها او نأجل احلامنا لفتره الى مانقنع اسرتنا فيها , او نستعد ماديا لها
في وقت التأجيل ضروري نستعد ذهنيا نطور انفسنا للافضل ونركز اكثر
لاتحزنين اذا انحرمتي من حلمك ، لاتكرهين أهلك او أسرتك او  بيئتك او المانع اللي منعك عن هالشي .











فكري أنه ( لعله خير ) فكري يمكن توقفك هذا في خير لك بانك راح تاخذين طاقه في مجال ثاني وترجعين لحلمك

 الاساسي بكل قوه , وكليها لرب العالمين
 فكري بطرق مختلفه ولاتستعجلين عطي نفسك وحلمك الوقت تذكري ان أبطا الامور انجحها ، وبقدر مامشيتي بتأني وبثقه بقدر مابنيتي صح .
دائما الأسره هي الاساس , كل حلم بالحياه يتعوض كل الامال راح يرزقك رب العالمين بأجمل منها دامك استشعرتي فضله عليك بس رضا رب العالمين ثم رضا اسرتك والجو الاسري الحميمي اللي تعيشينه لاتفقدينه بسبب حلم





هالكلام اناأاكلم نفسي فيه قبل ماأحاكيكم ..
او يمكن أحلامكم لقت قبول من البيئه اللي انتوا فيها بس يمكن في أحد صار له نفس اللي صار من العقبات واضطر انه يوقف بكى وحزن ، وخنقته العبره في كل ذكرى لحلمه  .
 بس صدقوني اللحضه اللي تفقد فيها حلمك او يخيل لك أنك فقدته لحضه صعبه مره يمكن تنهار , يمكن تكره الحياه ،، تفكر ياربي انا كل يوم قبل انام ماكنت افكر ألا بهالشي انا اعيش يومي وهالحلم قدام عيني ، أنا سعدت بكثير لحضات بحياتي بسبب ان هالشي بقلبي كيف يروح مني كذا ؟
لحضات تفقد حلمك لما خلاص تحس ان بينك وبينه خطوه بعد ٩٩ خطوه خطيتها باقي خطوه ويجيك شي اكبر منك ويحرمك منه .
يمكن في كثير ناس مو فاهمه اللي اكتبه بس اللي اضطر يتخلي عن أحلامه بسبب اقوى منه راح يفهم كل حرف كتبته
,

اللحضه اللي تفقد فيها حلمك ,
اختبار لقوتك أختبار لكميه الصبر اللي راح تتحملها ,
أول يوم بعد فقدان حلمك زي اول يوم فقدان عزيز على قلبك راح تكون صعبه أيامك ، راح تخنقك العبره كل ماتذكرت انك فقدت هذا الشي .
فعيشي فتره الحزن ضروري تعيشينها هالفتره بعدها راح تجيك أفكار ذهبيه تقويك للصدمات اللي بعدها
، اكتبي هالفتره ، اكتبي كل شي تحسين انه راح يفيدك في الفتره الجايه ،
خذي وقتك في أنك تعتادين عالعيشه بدون حلمك .
احزني ابكي فضفضي لأحد قريب وواعي بمدى محبتك لهالحلم وكميه تعلقك فيه ,  لاتفضفضين لأحد مايعرف أيش أمانيك لأنه راح يقولك كلام يزيدك ضياع ، صلي واستغفري كثير الله قادر يجبر قلبك ، ويعينك على حزنك .

في كثير ناس تقولك حارب من أجل حلمك وكلمات تحسسك بانك ضعيف اذا وقفت . 
صحيح الأصرار والعزيمه شي جميل بس لحضات تقدري تعيدي صياغه أفكارك أو تعيدين ترتيب أحلامك ,
ممكن تضلين تسعين لحلمك بس بطرق أخرى غير اللي انت متعوده عليها
ولو كانت القدره أكبر منك وشفت أن الموضوع يحزنك او الحرمان هذا يكسر فيك شي .
مو غلط أبدا انك تاجلي مو غلط انك تغيري الحلم أنك تشتغلي على شي ثاني الا أن يحدث الله بعد ذلك أمرا
الحزن العميق مجرد وقت راح يضيع وحاجه راح تهز شخصيتك وتغير نضرتك للحياه بشكل سلبي .
,
رب العالمين يعطينا الصحه والعافيه والكره الارضيه وكل شي فيها عشان نسعى عشان نغير عشان نتعلم
انت تحصري نفسك في مربع وشي معين ليش ؟
الحياه فيها أشياء جميله
وأيه ادري :
راح تقولي بس انا ماأتمنى الا هالشي ابغا الحلم اللي حلمت فيه طول عمري .
,
لا انتي حلمتي باشياء كثيره بس ركزتي على هالحلم
فكري في الأشياء الثانيه اللي كنتي تحلمي فيها وابدي فيه
طيب خلاص ..
 حزنك الطويل راح يغير شي ,, طيب اذا انت مشيتي ٢٠ خطوه  عشان توصلي لحلمك وتوقف بقدره قادر
. فكري في ٨٠ خطوه الثانيه .
,


  اشتغلي بشي ثاني هدنه نفسيه عشان نفسك عشان روحك هذي هي أهم شي بالحياه .
أهم شي قلبك هذا مايتعب بالحزن لأنك تحتاجيه يكون سعيد لأن في حلم ينتضرك في لحضه راح تفرح فيها ..
وتقولي ان أجمل شي بالحياه اللحضه اللي انحرمت منها من هالشي لان اللحضه هذي صنعت لي مستقبل ثاني أجمل أجمممل بكثير .
راح تضحكين كيف انا حزنت بهالشكل
,, احزني ,, ماأقول لاتحزني ,,لما تتعب على شي ويروح الحزن والألم شي طبيعي بس لاتطيلي الحياه فيه
,
عشان مايتتابع عليك عشان ماينهك روحك ويخليك ضعيفه وتصير الدنيا ابيض واسود وهي اساسا كلها ألوان
دقايق من عمرك تروح أيامك تمضي وانتي في حياه مأساويه ليش ؟
قومي ووقفي على رجيلك  ..  شوفي الأمكانيات اللي عندك طوري نفسك وامشي في حياتك
احنا خلقنا عشان نعبد رب العالمين و نسعد نفرح ونسعى في الحياه بما يرضيه
تذكري وعسى أن تكرهوا شرا وهو خير لكم
في أشياء في الحياه تكون أقدار تمري فيها عشان ربي يعطيك القوه  وتعلمك  التحمل للي جاي
أحتسبي الاجر وارضي وفوضيها لرب العالمين .
وباذن الواحد الاحد ربي ماراح يخيبك ويعوضك بأجمل منها .✨




واخيرا بالله مو صاير تصويري دراما بعض الشي 🧐 صايره احب هالمود بالتصوير