اكليل الورد ^^

يونيو 18, 2014

السلام عليكم يالربع

اليوم جيتكم بتدوينه عن اطواق الورد اللي رجعنا لها ..

قبل فتره تزوجت خيتي هذيك اللي حطيت بوست توزيعات خطوبتها اول بوست لي ..

بزواجها ا كنت حامل بالشهر السادس وماشاء الله الكرشه مرا باينه ويبيلها فستان ناعم ففكرت احطه يغير على شكلي شوي ثم فكرت اختي تحطه قلتلها انتي سويه عشكل عقد براسك

وانا بوزعه على جنب بالتسريحه بس بالاخير كلنا سويناه على شكل تاج وطلع جميل وكثير ناس عجبتهم الحركه .. عاد القصر كان فيه جسر ومويا داخل القاعه فينقاله سوالنا جو ^^

المهم قبل لااسويه احترت كيف بسويه والا اشريه من النت طيب ودي يكون طبيعي المهم بعد بحث وحوسه عرفت طريقته والشكل اللي ابغاه وطلعت على السوق (محلات الخياطه) قبل الزواج بخمس ايام عشان اخذ اغراضه اللي هي :

1 _ اعواد حديد مدري شيسمونها اللي تجي تنلف بسرعه اخذت 20 حبه طويله يمكن متر الحبه .

2- مجموعه ورد صناعي بالوان فستاني والوان فستان اختي اختياط اذا تورطنا بالطبيعي .

3-شرايط عشان الف فيها الاعواد الحديد وبعدها اركب الورد .

طيب للاسف ماصورت الطريقه بس بشرحها لكم بالتفصيل :

. اخذت عود حديد واخذت فيه مقاس راسي وبرمته من ورا لين صار زي التاج

. شلته من راسي صار شكله دائري ومبروم عجنب

.اخذ ت9 حبات من الاعواد الحديد وحطيتهم معه بنفس الطريقه وثبتهم مع بعض زين

ركبته على شعري تاكدت ان المقاس مضبوط

. مسكت شريطه وصمغتها عليه بحيث تخفيه بطريقه اني الفها عليه للاخير يعني لبست الاعواد الحديد

وخليته على جنب

. سويت واحد ثاني بنفس الطريقه بس فرق اني ركبت عليه الورد الصناعي بالصمغ احتياطا ان ماضبط الطبيعي

جهزته قبل بفتره .