التدوينه اليوم عن شي يمكن عادي أو بسيط بس انا فعلا أبغا ادونه لنفسي اولا ولغيري ثانيا
ليوم انا راح يجي اكون نسيت هذي السعاده اللي عشتها ,,
التدوينه اليوم عن أول وضيفه ..
اول وضيفه كانت بسيطه ولطيفه بس لفتاه بسيطه كان شي أكثر من المتوقع .
وبالرغم اني مااستمريت فيها لبعد المسافه .
بس لسبب ما عطتني دافع اني ايوا اقدر , ايوا لما كنت بالثانوي اقولهم اني راح اكون عندي شركه تصوير او تصميم ايوا صار
يعني هو صدقا ماصار بس اني دخلت وصرت موضفة في شركه للتصوير ههههههه يعني مو لهدرجه راح تتحقق الأحلام
المهم :
قبل ٣ سنين قررت أني ابدا اشتغل بتصوير المناسبات مثل ماقلتلكم مره اني بعد تصوير زواج صديقتي وبعض زواجات لأهلي حسيت الموضوع شي جميل وعلى قولتهم لقيت نفسي
وبالرغم من انني كنت اعرف رأي الاسره الحاكمه بالموضوع بس سويت اني القويه وبديت
اشتريت العده والاشياء وحبه حبه جتني طلبات وبسرعه بدا حسابي يزيد متابعين .. والي اصورلهم يرجعون لي لتصوير اقاربهم بس البيئه تفرض رايها ،،، بسبب مشاكل تصوبر المناسبات من التاخير الى ٣ فجرا وهالأمور اضطريت أترك الموضوع بعد ٦ مناسبات صورتها استمتعت فيها لاخر حد .
بعدها شفت انسانه لطيفه كنت اتابعها من ايام الفليكر كانت موجوده عندي واعلنت انها تبغى مصورين ومصممين لمؤسستها
كلمتها ورحبت بالموضوع وقالتلي انا ابغاك تكونين مصوره مو مصممه لاني حابه يكون شغلك بالتصوير تبع التيم معنا
رحت قابلت ألطف مديره شفتها بحياتي , قد ايش لطيفه .. محترمه ,, سالتها عن طبيعه الشغل قالتلي حاليا أنتي راح تمسكين الحجوزات بالمكتب تقابلين العملاء وتوقيع العقود وهذي الاشياء لما مااكون موجوده ..
بعدها راح نتكلم بخصوص تصويرك للاطفال ,,
وداومت .. في مكتب باباراتزي استديو :
من أول يوم عرفت قد ايش هالأنسانه لطيفه على قد ماأرتكب أغلاط وأكلمها الا انها ترد علي بطريقه جميلة :
أسماء حبيبتي عادي هذا أول يوم لك مو مشكله ,, أسما العميله جدا مبسوطه منك ,, اسما لاتهتمين خلاص
أنا راح اقولها تنتضرك .
هالشي شفته جميل صحيح بس متى حسيت قد أيش هالأنسانه غير لما توضفت عند غيرها لما توضفت عند مديره بروفشنال في التحبيط وتكسير المجاديف مديره ودك تروح أقرب مكتبه وتشتريلها أبسط كتاب كيف تتعامل مع البشر بشكل عام .
كانت فاهمه الأداره انها مجرد سلطه وتفرضها.
بس روابي ..
روابي كنت أرجع كل ليله من دوامي الثاني محبطه لدرجه البكاء اقول في نفسي الله يسعدها دنيا واخره .. قد ايش كانت متفهمه ,, كانت اخت بالرغم اني مااستمريت عندها شهرين بس حسيت انها فعلا قريبه ,,
وانك تلاقي انسان يراس عملك بهالشكل يحسسك انك انت جيد انت اساسك جيد واغلاطك هذي مجرد شي عارض وراح تروح كيف يعطيك الثقه اللي تخليك تحس اني انا ابغا احافظ على هالثقه واعطي افضل افضل ماعندي .
انا ماادري هذي البنت هي مثقفه وانسانه واعيه وقرات كثير كيف تدير موسسه صح ولا هي انسانه بالفطره احساسها عالي بالناس وتعرف تزرع الحماس بقلوب موضفينها ,بالرغم من صغر سنها .
أنا كنت موضفه جدا بسيطه بسيطه عندها وتعاملت معي بكل هذا اللطف بالرغم من اغلاطي كيف مع غيري
لحضات لما اشوف سنابها واشوف الناس تقولها صوتك يبينك مغروره اقول اه بس لو تدرون :
هذي المديرة ,
طيب أيش اقولكم عن المكان ؟
المكان كان جميل كان مكتب اسمه شي وركس SHE WORKS
فكرته ان يكون مكان لأي سيده أعمال عندها بزنس وحابه تدير مكتبها ولها مجالات مثل مكاتب وغرف دورات تدريبة واشيا جميلة
صاحبته أول يوم جت جلست على الطاولة عندي وتسولف معي حبيتها كنت احسبها موضفه زينا طلعت صاحبه هالمكان اللي يفتح النفس .
,
بعدها تعرفت على بنتين ( مها المعاري + ندى الحربي ) راح أكتبهم لاني ماأبغا أنسى أسماء زميلات أول وضيفة
ألطف من كذا ماشفت :
شفتي اللي تجلسين مع ناس وفجاه تحسين أنه تعرفينهم من زمان الله يسعدهم وين ماكانو كانت الجمعات اللي كلها ضحك .
الفتره اللي كنت موضفه فيها كانت فتره صعبة من حياتي كنت أمر فيها بمشاكل الوضع الطبيعي اني اكون جالسه في بيتي افكر في مصير حياتي الجاي .
بس هالوضيفه البسيطه الناس الجدد كانت زي رساله من رب العالمين تقولي أن لسا الحياه فيها جمال لسا في ناس تحب وتنحب لسا ياأسماء مو وقت الياس لسا تقدرين توصلين لأماكن جميله وتعطين قد ماتقدرين .
كانت زي البلسم اللطيف اللي تعرفت فيها على ناس بحق لطيفه اخلاق وراقيه بمعنى الكلمة ناس خلوني اشوف جانب من الحياه جميل وساحر .
معرفه الناس معرفه الناس المحترمه الناس اللطيفة مكسب وشي من سحر الحياه .
مشاركة الناس الكلام بكل ببساطه ،، لما تشوف ناس تشبهك بفكرك بأحلامك حاجه جميلة مره مايعرفها اللي يواجهها
ماادري يمكن لأني انسانه اجتماعيه واحب الناس واللمه هالوضيفه شبعت هالجانب عندي
ولكن بعد شهر كنت اداوم فيه دوام متقطع تركت الشغل لسبب واحد الا وهو ( بعد المكان ) والراتب كله يروح عالمواصلات
كلمت روابي وقالتلي شي خلاني احبها أكثر
قالتي تدرين انتي من افضل الموضفين واكثرهم امانه توضفوا عندي وماودي ابد تطلعين كان ودي تكونين معنا , ولما وصلني الراتب وصلني لشهر كامل وانا ماداومت الا كم يوم في الشهر .
انسانه ساحرة بحق .
بعد هالوضيفه توضفت بمكان ثاني بس ابدن الانطباع الاول للوضيفه الاول قوي وجميل ماخلاني اشوف شي بجمالها
الحمدلله انها كانت وضيفتي الاولى .
