سمآ: تجربه

تصوير زواج

استديو نوفمبر 29, 2014

سلام ياأحبه ^^

في هالبوست راح اتكلم عن تجربتي بتصوير زواج صديقتي ..

طبعا التجربه مو كامله بس حبيت ادونها لنفسي ولغيري يوما ما ..

دايم كنت اكره تصوير استديوهات التصوير اللي يااما يكون :

سعره معقول وتصوير عادي جدا بدون عفويه وافكار مجر فيس ملطخ فوتوشوب وتعديلات او انه

يكون اسعار مرتفعه وتصوير يفتح النفس ,,

المهم دايم كانت تنرفزني هالحركه وصديقتي الصدوق حور كانت تدري باحاسيسي وفي يومن ما قالتلي اسوم انتي اللي راح تصورين زواجي

لاعاد مو لهاالدرجه اصور زواجك .. :خايف:

عمري ما صورت زواج بحوس الدنيا وبعد نقاش

انتهينا انها نفسها في صور عفويه وفيها شويه افكار وبنفس الوقت راح تجيب مصوره يعني بيكون تجربه لي بتصوير زواج بدون مااخاف ان الاعتماد علي .

طيب

اول شي رحت ابحث عن تجارب لبنات صوروا زواجات للاسف مالقيت الاتجربه وحده موثقه بشكل متكامل ويفتح النفس كانت التجربه لهوني فديتها وهذا رابطها

تجربتي في تصوير حفله زفاف

استعداداتي كانت :

1- تغذيه بصريه بصور الزواجات الاجنبيه اكثر شي قلبت متابعاتي بالانستقرام لاستديوهات تصوير

2- حفضت مجموعه بجهازي وقسمتها 3 مجلدات :1heart:

وضعيات تصوير العروس / كانت للعروس نفسها

وضعيات تصوير اهل العروس / لاخوات العروس بزارينهم لحال ومع العروس

تفاصيل الزفاف / لقطات للكعب حق الزواج الله يكرمكم الكوشه الفستان البوكيه الدبله . :pinkheart:

للاسف ماكان لاسوفت بوكس ولاخلفيات بس كاميرا سوني احترافيه اضاءتها جميله .

كنت مقهوره اني ماقدرت اوفرها عشان تكتمل تجربتي بس بعد ماشفت الصور ماحسيت انه اثر بالعكس كانت الصور جميله والعزل بطل فمااحتجت الخلفيات كثير .

يوم الزواج :

. رحت عالصاله بكاميرتي وغريضاتي والعدسات دخلت عند صديقتي وجلسنا نسولف شوي وبديت اصور لقطات لفيسها لتسريحتها

وتفاصيل من الفستان

(ايدينها عالبوكيه - واختها تبخرها - واختها الكبيره تربط خيوط فستانها - وتفاصيل كثيره ..) :6:

بجد بجد تصوير العروس وفستانها الابيض متعه ماتنتهي :26:

ماكنت الحق اوقف تصوير احس ان تفاصيل كثيره كنت ابغا اصورها الافكار توالت علي وفتحت الجوال ومجلداتي وارويها الصوره وتطبق بسهوله

دخلت صديقتنا الصدوق الثالثه وبنوتتها صورت بنوتتها وساعدتني بافكار التصوير زياده ..

قلبنا ضحك ووناسه وتصوير كمان

دخلو خواتها الثنتين واستملتهم وحده وحده وتفاصيل فساتينهم وصور جانبيه لكل وحده وبعدين مع اختهم .

جا وقت الزفه

اللي هو امتع شي بالتجربه كلها

غير انها عروس زياده وقت الزفه كانت هيبته وجماله فضيع الاضاءه عالفستان على منضر العروس بشكل عام كان اميري ويفتح النفس طبعا كان فيه مصوره فيديو وخواتها يصورون بعد

وكلهم فيديو
الثابت كان علي

طبعا صور الزفه كان اهم شي اني اوصل لسيولوليت العروس اللي الصوره تكون من ورا وتبرز حدو الفستان للاسف مارتبشت وقت التصوير وماقدرت اصورها بس عوض عنها بصور تجنن ثانيه جانبيه للعروس

حاول الاقي لقطات عفويه مثل اختها تضبط طرحتها لما وقفت عالمنصه وامها تسلم عليها لحضات الدموع :بليز:

لقطات خواتها لما وقفوا من بعيد وبعيونهم نضرات الفقده - قبلاتها للاطفال .. لقطات كثيره ماكنت الحق اصورها بجد لقيت نفسي على قولتهم . خلاص قررت بعدها اقلب مصوره اعراس وكني اسمع صوت اخواني بقولون تبطين عضما ياأختاه ,, :yarab:

اصلا عايدي اهم شي الامل :ام:

وبالاخير جا وقت الوداع

لما تلبس عبايتها هنا كمان لحضه ماكنت ابغا افوتها هاللحضه طبعا سويتها كامله فيديو لانها امتع

واهلها يرتبونها ويلبسونها فستانها ويودوعونها عشان تروح لسياره زوجها ماكان فيها اي ثابت .. مجرد توثيق للذكرى بدون احترافيه بس بحق كانت مبكيه ياخي

رأيي بالتجربه

جدا جدا كانت تجربه جميله ساعدني الاضاءه القويه االلي بالكام السوني استمتعت وانا اصور توام روحي ماانكر نزلت دميعاتي بكم لحضه .. :مرهفة المشاعر*:

كانت تجربه جميله لاخر درجه والاحلى متعتي وانا اشوف اهلها يمدحون بالصور ويدقون يشكروني عليها واهل زوج اختها اللي طلبو رقم المصوره هنا انا رحت ملللح او انه كبر راسي شوي :عيون الليل*:

فرحت اني وثقت احلى يوم بحياتها عشان تشوف كل تفاصيله بدون ماتنقهر على شي .

مااضطريت اعدل كثير بالصور الحمد لله .. البشره كانت صافيه والالوان معدله تمام ..

جلست اسبوع سعيده بهالتجربه كانت امنيه وحققتها وشفت نفسي فيها . :lady fashion*:

نصايح للي يفكر بتصوير زواج

1- التغذيه البصريه والطباعه

احفط صور واطبعها وخليها بمجلد اريح لك بتصوير وضعيات العروس واهلها ماتضطر تشرح ويضيع الوقت وماتطلع الصور تمام

2- جهز 3 ذاكرات مساحتها كبير من 8 قيقا او اكثر

خلك حريص عالذواكر لان مجرد ضياع وحده راح تقلب هالسعاده لتعاسه بالنسبه لي الكام عند صديقاتي والذاكرات بشنطه اليد حقي تضيع الكام ولاتضيع الذاكرات .

طبعا بطاريتين جاهزه مشحونه والشاحن معك مجرد ماتخلص بطاريه دور فيش واشحنها بينما تصور بالثانيه ..

3- اغراض التصوير

لو كان عندك سوفت بوكس وفلاشات تصويرك راح يكون افضل بكثير .

4 التفاصيل :

حاول انك تهتم بتفاصيل القاعه الطاولات الكوشه وتخصص لها اهميه عندك طبعا للاسف انا جيت متاخر وماقدرت اصور القاعه الا عالسريع وباخر الزواج بعد

راح تلاقي ناس من اهل العريس او العروس يضايقونك بكلمات من باب التدخل حاول انك تكون حازم اكثر بالكلام .. على حسب الموقف ,

وبالاخير استمتع واضحك وخل روحك مرحه ولاتكون مبوز لان سعادتك راح تقلب عاللي تصورهم . :ورده بيضاء*:

على طاري التبويز للاسف المصوره اللي جابوها كانت نفسها بخشمها اول مادخلت جلست تعيب بالغرفه الصغيره وانه ليش دفعوا فلوس بدون مايشوفون الغرفه اللي راح تتصور فيها العروس وطنقرت الاخت وماطلعت الخلفيات وقتلت نفسيه العروس عالفاضي

بجد حاجه تضايق مو معناته اندفع لك فلوس تجين بهالنفسيه الخايسه .. بجد كنت ماسكه اعصابي وانا اشوفها قالبه البوز كانها مجبوره عالجيه ..

للاسف اغلب الصور فيها ناس فماقدرت احطها هذي توثيقات لهذاك اليوم الجميل بعد التعب صورت هالصور وانا طالعه
:M!ss PinkY*:

هذا في بيتي بعد الحوسه طبعا البوكيه حق العروس عطتني اياه رفيقه عمري وللحين محتفضه فيه

لقطات لزواج أختي وملكه صورتها ,, بعد اول تجربه ,,

واخيرا يمكن

يمكن تجربتي ماتتعادل بتجارب ثانيه وتعتبر بسيطه .. بس يمكن تفيد احد فحبيت ادونها .لي ولكم .

ان شاء الله تكون هالتدوينه نفعت احد ,,
سعيده باشتراككم في المدونه
:أم دانه*:

تجربه حياه

احب مارس 28, 2013

( عندما يكون مالديك غير كاف )
كتاب قريت عنوانه بجرير

وحسيته كانه يعرفني يتكلم عني أي أي انا
:d:

احس اني اتعب عشان ارضي هالعالم وقد مااكون اكون لبقه ومااجرح شعورهم وهم كل مالهم يزيدون

المهم مالكم بالطويله شفته وخذته علطول :احبتس:

وبديت اقرا فيه

كانت بدايته عكس الكتاب وبدا يخيب املي منه بس فايتينق
لازم احارب ملل القراءه اللي دايم فيني واكمله

وكملته جد بالوسط بدا يعيشني جو انه هالاخ عارفني وعارف وش اللي ينرفزني في العالم .

تكلم عن انك ماتحاول ترضي الكل لان هذا يسمى ضعف ابد مارح يحسون فيه اللي حواليك .
:خايف:

\ولاتفني حياتك لناس انت كل مره تشوفهم ماقاعدين يبين فيهم المعروف عاد هو ماقال كذا
:11:

بس مجازيا سلكو انتو بس
:d:

وكانت يتكلم على الناس اللي ماتشوف الاالاشيا السلبيه وسماهم المزعجين

وناستهم انهم يرسمون على وجهك الكابه يحسون انهم اقوى ومن هاذا القبيل

عاد مسكت الافكار اللي فيه
وقلت ميسو بعد شبدي

فايتينق

راح اطبقها كلها عالناس ماعد اهلي
:writingbaby:

وصحباتي المقربين والناس الكبار بالعمر عاد مانمصخها >>هذولا استثناء بالحياه

^.^

اوكيشن \

هالناس المزعجين والمتنمرين اللي مالها داعي والنفسيات البجيحه اللي يقولون كلام وانا اقول في نفسي ماقصدهم كذا ولو عندي رد لكلامهم احس اني ماودي اجرحهم زي ماجرحوني واسكت واحتسب الاجر . :stopsign:

مره صديقتي قالتلي ترا انا ادري انك ماودك تجرحين احد بس ترا هالنوعيات ماتنجرح وانتي كلامك ورده فعلك مارح تكون قاسيه بس بتعطي حضراتهم خبر ان انتي هالشي يضايقك وان حدكم هنا وبس
:5alo:

لاتخلينهم يطغون عليك بالطيبه الزايده

ايوا كل ماتنازلتي عن شي وشافوكي مستغنيه عن هالشي ومخليتلهم الحبل على الغارب راح يطغون عليك بكلامهم واذيتهم

طبيعه الانسان تشوف انسان مستغني عن شي تطغي عليه في هالشي

وكلامها كان شي ساندني في اني اتغير لبا قلبها .

وبدات الانطلاقه تيرراراام
:ksho5ey:

صقل الشخصيه + احترامها + تحديد الحدود لبعض النفسيات

نبدا

1- احترم نفسي وازيد من ثقتي بنفسي

اول شي كتبت بممذكراتي

اشياء في كياني الخارجي جميله للغايه

أشياء في طباعي جميله للغايه

مهارات خبيره فيها

اطراءات وجماليات علمت بها من بعضهم

شي خاقين عليه العالم فيني

أشياء مش ولابد فيني بس تحليني

2- عززت القراءه بوقتي .

3 - والمحاضرات وقت الشغل اشغلها بالايفون

شغلت وقتي وصارت عندي حصيله معلومات خلتني اقدر نفسي اكثر

4- سجلت في دار للتحفيظ وهذا كان
احلى واكثر :dreamheart:

شي حبيته من برنامجي اللي سويته.

وبديت اعزز ثقتي بنفسي باني مااتذكر الا الاشياء الايجابيه فيني وماافكر بغلطي كثير اتعلم منه وارميه وراي :heartlamp:

وابدن ماأتعود اقول اشيا سلبيه مثلا صار شي ليش انا دايم كذا مابغا اعزز هالخصله فيني
لااقول انه الضروف مو انا اللي تسبب بهالموقف وان المرات الجايه بتكون أحسن
وراح اكون قد الموقف .

وحسيت اني بديت اتحسن صار مايبان علي اذا انحرجت صرت اتحكم ينفسي اكثر

وصرت واثقه من شخصيتي اكثر
والاهم اني حبيت ذاتي . :yeswin:

وهالنقطه لازم نهتم فيها كثير لاني بقدر ثقتنا بانفسنا راح نبان واثقين بردودنا وحتى نضرتنا نضره واثقه. :brsh:

طيب نبدا بالنسبه

لتحديد الحدود مع العالم المزعجه والبجيحه .

1 _ اذا احد قالي كلمه مااعجبتني مااستسغتها لازم يوصله خبر وفي الحال بدون تاخير ان كلمتك يالطيب مابلعتها وماعجبتني كلش . :5thinking:

2 – اذا احد انتقد فيني شي بوضوح انتقد فيه نفس الشي بوضوح ايضا وخزه خفيفه عشان يحس . :plusheart:

مثلا جت وحده قالتلي ( انتي كذا ماتتغيرين دايم عصلا اقولها قصدك رشيقه وانتي دايم ماتتغيرين كذا دوبا )

طبعا اراعي ان هالانسانه بالعاده تقول هالكلمه ولااول مره لها لان في ناس ماقصدهم وفي ناس يغثونك بنفس الكلمه كل مره . :007:

3 _ اذا احد طلب مني طلب (فوق طاقتي ومااتحمل ) اوقف ستوب واقولها بودي بس مارح اقدر .. >> وهذي اكبر شي يقابلنني واعجز اقول لا

4 – واذا احد سالني عن شي بمصخره وكررها اكثر من مره اجاوبه بنفس الاسلوب

مواقف صارت لي

موقف علمتني صديقه منه الكثير

مرا قريبه لي قالتلي .. لما نروح جمعه الناس الفلانيه الاحظ عليك شي ترتبكين وتحسين ان فيك شي غلط ..

لان يااما الناس يحاولون يتفادونك او يعطونك نضرات عاديه نضرات فارغه من أي شي

قالتلي الناس عامه والنساء بالذات شخصيات تغار وتحتر من أي انسانه جميله او جسمها جميل

او

حتى يمكن شي عادي فيك هي متشققه عليه ومو لاقيته فتحاول تخليك مهمشه بالمكان لان وجودك وبروزك يضايقها

فكل مالقيتي حريم يتجاهلونك لادنى سبب

اعرفي

ان ثقتهم بنفسهم ناقصه وانك جميله بعيونهم في شي وقاهرهم هالشي بالعكس خليك واثقه .. ولايهمونك ..

الناس الواثقه من نفسها تستقبل وتتاقلم مع ايا كان وتكون فاتحه قلبها لتتعرف على أي احد ..

الثقه بالنفس ,, تغير الكثير والكثير والكثير >> حشا فيري

مواقف صارت لي بعد ماطبقت الكتاب ومخمخت عليه

مره كنت اسولف في الدوام مع زميلتي اقولها الجسم اهم شي .. كل ماوصلتي للوزن اللي تبغينه تتهنين باللبس اكثر واكثر

قالتلي وحده ثانيه مالها دخل بالسالفه على اساس ينقال لجسمك المثالي شوي وتصيرين مشروع عود اسنان وضحكت ضحكه استزراء رديت عليها وهي كانت مليانه شوي قلتلها احسن من اللي شوي ويصير مشروع برميل نفط

وضحكت بتسليك ثم بلمت وسكتت لانها دايم تدقدق بهالحركات فيني ودايمن كنت انحرج واسكت

كذا احس شافت كاني خطيت سور بيني وبينها كذا احس اني دقيت رقبه وانا اشوف نضره الاحترام بعيونها .

وكل مره ارجع البيت احس يوجعني قلبي بس هم اللي حدوني
تكسير المجاديف هذا بطلوه :dandana:

وبقدر احترامك لنفسك وتقديرها الناس بتقدرك وتحترمك بعد .

موقف آخر انسانه
كنت احترمها واقدرها كانت قريبه لي زوجه انسان قريب لي

وكنت

دايم اذكرها اذا رحت مكان باي شي بسيط واحاول احسسسها ان احنا اهلها واساندها باي شي تطلبه

وامدحها عند الناس بسس ولا شي ماكنت الاقي كلمه شكر ابد كان اللباقه والذوق العام محذوفين من قاموسها

لبست لبس الكل خق عليه وكثير سالوني من وين شاريته يعني شي متاكده انه \ توب وجميل

لبسته ورحت لعندهم بجمعه شافتني قالتلي وش هاللبس

تعالي غرفتي عندي بلايز احلى من كذا قلت لا والله وش فيه هالبس قالت مخليك مدري كيف ... و... ,,,,

قلتلها لولا اختلاف الاذواق لبارت السلع انا احب هاللبس مرا شكرا
قالتلي انا ابغا مصلحتك وابغاك تطلعين بمنضر حلو تعالي دولاب ملابسي مليان ملابس .. وش هالذوق اللي معك ياربيه وصارت محادثه طويله بس طبعا ماغيرت لبسي ولاشي خير ياماما

كانت رده فعلها تناقض للي اسمعه من الناس

خلاصه الموضوع اني قلت في نفسي كيف الواحد لما يتشبث بذوقه يصير اذواق الناس عنده ولاشي وذوقها كان عكس ذوقي وانا اشوفه قديم مرا بس ضحكت بنفسي وحسيتها مسيكينه وماخذت عليها

بس تكررت وتكررت وتكررت وابد ما كنت منتبهه ان هالانسانه واصله حدها مني لين مانبهتني صديقتي سريعه البديهه عليها

شافتها بزواج ومن اول جلسه معها قالتلي ذا الانسانه غيوره . واحسها تشبه ميسر حق فطمه بحركاتها
:مابي:

وبديت الاحظ واتذكر مواقفها وانتقاداتها المتواصله

وبديت اطبق اللي بالكتاب عليها

من جد تغيير 180 درجه

صارت تحترمني وتمدحني وتتشكر على أي شي تافه اسويه لها

واذا حتى حست انها هه هه هه ضايقتني بكلمه تصجني بالوت ساب اعتذارات والشي يكون جدا تافه

وربي استغربت ماتوقعت رده هالفعل وانا الشي الوحيد اللي سويته

اني تنتقد انتقد
:21:

تتمصخر اتمصخر

تجرح اجرح
:3:

اضف الى ذالك اني مااعطيها وش ابد .

مو لاني ابغاها تتغير بس خلاص احس اني عفتها من حركاتها السامجه معي وصرت استصغرها كثير مو بيدي حتى .

واخيرا هالتعامل للنفسيات اللي تعبت معاها واذتني اكثر من مره ومرتين وثلاث بكلام سامج ويسم البدن ..
حاولت اعتبره من صنائع المعروف .. وعدم اذيه مسلم بس ماش كل مااسكت يتمادون اكثر واكثر ,,

وتحولت مسمسا

من شخصيه ساكته عن حقها الى فتاه شخصيه يحترمونها من اول مايشمون عطرها جاي >> لالاعاد هوامير الصحراء
:d:

وماقبل الاخير احب اقول اني في ناس يالبا

ينحطون عالجرح يبرا :d:

عفوين

وطيوبين

وجلستهم تسرسح عالقلب سرسحه
هذولا اللي تحطهم بعيونك وتعاملهم باحسن من الحسنى . :1heart:

اول شي اللهم لك الحمد
:dreamheart:

ثم شكرا للناس اللي من جد يحبوني ومقدرين طيبتي ونبهوني على اشياء بذوق ولباقه ..

والكتب الي قريتها وثقفتني من جد الكتب حاجه لازم الواحد يخليها بنضام حياته

وهما كتابين (كيف تكسب الاصدقاء وتوثر في الناس )

وعندما يكون مالديك غير كاف )

الكتاب الاول ينمي الذوق وفن الاطراء عندك :10:

والثاني يقولك ان مو كل الناس تجرب عليهم الكتاب الاول ^^ :devil3:

اقتباسات من الكتاب الثاني من تصويري

واخيرا حابه اقول .. مو عيب ان الانسان يحاول يغير شخصيته للأحسن ..
ويصقل ذاته .. وياحلاه التعب لما تتعب على ذاتك وتشوفها تنجح باهدافها لو باشياء صغيره ..
يمكن هذا شي عادي بالنسبه للبعض بس انا تعلمت منه كثير ..~
واحبكم ياجميـلين

:cuet cute:

اراكم في تدوينه .. اخرى احبتي ..~

تصوير زواج

تجربه حياه

التصنيفات *

my followrs

recent posts

الأرشيف

سمآ

Instagram