اهلا متابعيني الجميلين 

مساء وصباح الخير اينما كنتم >>كيفني بس

تدوينتي اليوم عن شي اثارت نقطه مدري شسميها 

كذا شي مدري كيف جاي 

على 

شي  كنت حدي معجبه فيه وباقي معجبه فيه 

بس تغير اعجابي من الفساد اللي خرب جماله وفائدته

وحرمنا من حاجه جميله كنا راح نستفيد منها كثير 

  هاي كيكرز  

 كيك واممادراك ماكيك

الـkeek   برنامج نضامه تقريبا مثل اليوتيوب 

فيديو مايتعدى ال36 ثانيه 

وتتم مشاركته مع الاصدقاء وزوار الحساب 

طيب كيف عرفته قبل كم شهر قبل ماتطلع البلاوي المتلتله 

قبل فتره كنت اتصفع مواقعي المفضله وكانت في بنت اتابعها بمدونه من المدونات مدونه لطيفه ومفيده 

وقالت انها سجلت بkiik قلت بنفسي شنو كيك

 اتبعت الرابط اللي حطته وتصفحت كم مقطع من مقاطع الاجانب بحكم انها بالواجهه

عجبتني مرا فكرة الموقع 

 مقطع فيديو 

حوالي 36 ثانيه

ماله حدود مايجبرك تحط شي

 (مو مجبر مصور تصوير بروفيشنال ويكون وقته طويل)

مافي اسهل من كذا .

اغلب الكيك تصوير سريع وجوالات بالاغلب يعني مو مجبور اجيب كام حلوه واختار مكان حلو واحاول اطول مقطعي عشان 

يستهوي الناس ويواكب الجو العام زي اليوتوب 

لامقطع بسيط بكاميرا عاديه وهادف وتفاعل جميل مع المجتمع .

صحيح ان الوقت القصير راح بخلي الجو العام تسليه اكثر منها فائده بس مايضر

من جد اعجبتني الفكره كثــييييــر

 وبديت اتخيل مقاطع كثيره تصورت وكانت ممكن تنحط بالنت بس جو

 اليوتيوب اللي شوي متطور ومشورته يمشور عليك السالفه وتبطل .

يعني في مقاطع نصورها جميله وصغيره نتبادلها مع اقاربنا واهلنا 

ونتفاجا باعجابهم الكبير واستفادتهم من هالمقاطع او حتى مقاطع مضحكه 

عندنا ماتخل بديينا ولابعاداتنا تكون محبوسه بهالجوال واحد ولااثنين شافوها 

وعجبتهم ومع الايام ديليت لامتلاء الذاكره

يعني مثلا مره كان عندي 3 سلاحف وكانو مره زغنونات وكتكوتات  

 ومره حطيتهم بسطل وحطيت فيها شجره لعبه

ووحده منهم نامت وهي واقفه على الشجره جلست اضحك عليها وطرنق  

جت عبالي اصورها وارويها امي مسكت الجوال 

- فتحت الكام 

- بدء التسجيل 

- صورتها لا وبديت من نقطه من السطل وامشي لين اوصل لعندها ينقالي اكشنيه وبعدين بقطعه جنبي حركتها لان الاخت لاصقه بالشجره >> مثبته المدام

 حركتها طاحت على ضهرها وهيا لسى نايمه طافت عالمويا علي ضهرها وهي رايحه في غيابة الجب

  كنت ميته ضحك وكاتمه ضحكتي وشوي قامت

-  ثم سكرت الفيديو .

طيب هالفيديو اللي كم ثانيه كل انسان من اقاربي شافه مات ضحك و قالي ارسليه لي اياه .

وبعدين نقلته بالجهاز وتفرمت وطار مثل غيره من الفيديوهات .

 طيب فيديو ثاني

 واحد من اخواني سافر الفلبين ومع انه فاشل بالتصوير ربي يسعده قلت له صور ليا طريقك من تنزل من شقتك لين المعهد صور لي مقطع طويل بس من اول المقطع ومن اول لقطه عرفت الجو بالفلبين كيف النضام وكيف الناس بالشوارع وحسيت اني معهم من جد 

مرا صور مطعم بالفلبين

مرا صور البيتزا الاليمه حقهم لما يطبخونها

مرا صور احتفال اطفال بمدرسه فلبينيه

واشيا كثيره 

 طيب كل هالمقاطع شافوها 4 او 5 وراحت للهارد ديسك وانتست 

طيب 

هي ذكريات صح بس كثيير ناس راح تستفيد شباب يبغون يدرسون 

ناس يبغون يشوفون جو الفلبين شوارعها اسواقها مطعمها منطقه معينه 

بدل ماافرفر ساعات بالنت ادور كم صوره وكم مقال مايشبع فضولي 

ولايجيني تقرير صوره وحده عن مكان معين طيب ودي اشوف المكان صح ودي اشوف الجو اللي فيه 

صوره وحده يشرح السفره كلها فيها

 لا وبعد مهتزه ومساحتها كبيره قد الشاشه 3 مرات >> حاجه تقتل

 بتقولون لي حطيه باليوتوب طيب اليوتوب كمان له جوه المرتب حبتين ويبي للمقطع شوي زبرقه ونقل من الجوال للاب

ليش ضغطتين بالزر ومن الجوال عالموقع سفري بدون ذاكره ونسخ ولصق وحوسه من مجلد لمجلد 

وتفاعل مع المجتمع واحتسب اجر ان هذا علم وماكتمته .

 مرا رحت سوق مكان مميز دقايق اصوره واحطه بالنت 

طيعا بدون صوت وتميلح وحركات سامجه انتي تبغين الفايده انتهينا .

اوكيشن وبعد ماجات ببالي هالمقاطع واكثر وتخيلت كم واحد ممكن يستفيد منها قررت اني اسجل مع انه ماعندي شي بس

قو  اذا ماافدت راح الاقي مقاطع مفيده 

دخلت ولقيت مقاطع بنات عربيات مسلمات ربي يسعدهم

مقاطع جميله سفرات طلعات زوارات وضيافه 

  بزران ومقاطع تضحك وقطاوات بعض البنات واشياء جميله بدون اخلال بالدين 

بدون تميلح واصوات ضحك وسماجه

عادي سوي كل شي تبغينه بالحياه بس حبتين ضوابط عشان اخرتنا , وتصيرين توب التوب 

  تحمست 

 وغبت فتره 

وبدت الفضايح

  تطلع بنات يرقصون بنات يرقمون بنات مصورين اخوانهم وواهلهم وبالمقطع الثاني يغنون قدام الكام  قل سنع قل ذوق قل اخلاق شي مايتصدق 

ايش ياجماعه

اشبكم 

وش صار ؟؟ وش هالتنفيس ؟ وش بلاكم ؟ من جد وش فيكم ؟ شاربين شي ؟ ماكلين شي ؟ فجاه احس الحياه انقلبت ؟ 

ولاحنا ماكنا ندري عن هالاشياء ؟ 

ههههههه والله شي يضحك يبكي ماتدري كيف جاي . 

يعني والله الخرفان بعض البنات مو العيال 

انتم كن احد مقمط وشاد عليكم وفجاه فك هالقيد وانتشرتو على قولتهم تعيثون فسادا 

طبعا قبل اي شي ماارح اتكلم من باب الدين

1-  لان هالشي منتهين منه 

صوت المراه بغنج

الاصابع واليدين اللي عليها اشكال والوان ودلع

وقوقل عندك اكتبي ماحكم الشي اللي تبغينه وشيوخنا مايقصرون يبينون لك حكمه بالدليل من القران والسنه 

  الحلال بين والحرام بين 

والله اعلم 

طيب نقطه انتهى .

كلامنا هنا عن العادات والتقاليد والعرف والاخلاق وهيبتنا كمجتمع عربي واسلامي قبل اي شي 

   محد داري عني   

بخصوص البنات اللي يصورون اخوانهم وفجاه تصور صوتها ولانفسها وتتسيمج وتتميلح بطريقه انا بنوته دلوعه

حابه اقول اول شي لهالاخ 

- اللي ياما هو مو داري عن بلاويك وهنا نقوله اللي يعوضك في مصيبتك ولايبلانا 

- واذا هو داري وهنا اقوله وربي مابيدي شي اقوله غير انه العصمه كانت بيدك وانت ضيعتها وراح تتحاسب عنها يوم القيامه . 

يعني لاتقولين لي محد داري عني . 

مصوره كل قطعه من بيتكم وشوي رازه فيس اخوك الكبير وبعدين الصغير وبعدين مدرستهم وبعدين حيكم وبعدين صوره بيتكم من برا وبعدين ابوك وبعدين اسمك فلانه الفلان الفلانيه . 

لا ابدد ماحولك احد

   لاتضيعين شرف عايله    

 يعني انا قاعده افكر وانتي تصورين ابوك ولااخوك مافكرتي في مقطع الرقص اللي قبل كم يوم رازته 

يعني لازم يضيع شرف العايله ولاماتقدرين تنامين الليل 

ايش يامدام

م نفكر شويا  طيب انا سويت هالشي  وصورت نفسي وانا ارقص

 طيب ومره فتحته وشفت العالم هابه بالفيديوهات قلت يلا احطه بالكيك وصحباتي قالولي عاااتي مافيها 

شي

محد درا عنك وحطيته بكيك طيب وكمان قلت عاتي خلني اضيع سمعه بابا كمان 

 عشان نشتهر ونصير مآآرآآآ مشهورين وترزلي الوالد

هذي السذاجه بحد عينها

المشكله هنا ان الوالد يكون انسان كادح بحياته ومحافظ على سمعة اهله ومربي اولاده احسن تربيه ومعيشهم احسن عيشه 

ومدللهم اخر دلال انسان عايش عشان يشوف هالبنات رفعه وعزه له بكره 

اختي بالثانوي قالتلي شفتي فلانه بنت الـ اللي كانو جيراننا 

قلت ايوا 

يقولون لها مقطع بالكيك وهي مصوره نفسها وو.. تفاصيل 

وربي حسيت اني مو شي بس لمجرد ان عرفت هالانسانه ولو معرفه سطحيه بيوم 

والقهر الاكبر انها بنت ناس 

بنت لابو محترم وامها متوفيه 

طيب معناته هالاب صار كل دنيتك الحين مافكرتي شويه قبل لاتنشرين هالمقطع 

وش الطعنه اللي بيحس فيها ابوك تربيته والاخلاق اللي تعب عشان يزرعها فيك 

ياشيخه لو ماتعب يكفيك الانكسار اللي بيجي بعيونه اذا بس سمع مجرد سمع عنك كلمه تسئ لك  

لهالدرجه وصل فينا فقد الحنان نبي بس من يمدحنا ويقولنا واو

ايش ماكن السبب ومين ماكان الشخص 

نسينا ان احنا واجهه لاهلنا واخلاقنا اخلاق بيوتنا 

ولاتقولين ليا نت 

الاخلاق والتربيه في كل مكان تضهر .

   رجاءا لاتسيئين لنا   

خاربه .. خاربه .. خلاص مضيعه كل ابو شي اوك 

قدام بحفظ الله عزيزتي 

بس لاتسيئين لنا .. هالحجاب اللي حاطته على وجهك لمجرد الاستهبال 

احنا نحطه شرف وعزه ورفعه واجر باذن الله

يعني المجتمعات اللي ماتعرفنا راح تكون هالفكره السيئه عننا .

طيب دام محد هامك وانتي اقوى وحده خليك شجاعه واكشفي عن وجهك ولا وقفت الاخلاق هنا 

لا كيف  عيب مايصير وهالجسم المتفصل تفصيل 

مااقول الا

  صدق من قال ان لم تستحي فافعل ماشئت

الحمدلله الذي عافاني مما ابتلاهم به وفضلني على كثيرا مما خلق تفضيلا ..

ليتكم تشوفون كييكات الاجانب وكيف انهم فاهمين البرنامج صح ! وقاعدين يستخدمونه بطريقه سليمة ! انا ما اعمم لا والله فيه  بنات فيهم الخير والبركه وينزل مقاطع مفيده ! بس الاغلبيه ! الله يستر عليهم بس  
 

اللهم جنبنا الفتن ما ظهرا منها و مابطن

تعليق  اعجبني :

( الله يجزي صاحبه او صاحبته خير الجزاء  )

 الموقع برئ جدا ً مما يحصل فيه من إسفاف و إنحطاط ..
فهو أداة ..
إما أن تستخدم في الخير او ان تستخدم بـ الشر .!
كذلك تويتر او اليوتيوب و الفيس بوك ..
جميع موآقع التوآصل الاجتماعي هي أدوات ,, وسوءها على حسب إستخدامها ..
لكن المشكلة بـ أننا عندما يهطل علينا إكتشاف جميل
نبحث عن طريقة لـ إستخدآمه بـ الجآنب السيئ !!
في بعض الاحيان ,, تأتيني الشكوك بـ أننا سيئين في الاصل
و الا لماذا نستخدم التقنية المفيده في الإنحطاط الاخلاقي و الفكري
ونبتعد عن هدفها الاول !!

 تذكروآ ان اللهَ رقيبكمَ وحسيبكمَ يومَ العرضَ

 الامارات حجبت الكييك
قرار حكيم و صائب
اتمنى السعوديه تخطو خطاها 

  واخيرا .. 

ومتابعيني الجميلين معليه اعذروني عالاسلوب الاندفاعي  

 بس تعرفون لما يتحرك فيني هذاك الشي اصير حاجه غريبه

احبكم أد كدآآ    اد شعرات هالمليح