اليوم جيتكم بتدوينه عن اطواق الورد اللي رجعنا لها ..

قبل فتره تزوجت خيتي هذيك اللي حطيت بوست توزيعات خطوبتها اول بوست لي ..

بزواجها ا كنت حامل بالشهر السادس وماشاء الله الكرشه مرا باينه ويبيلها فستان ناعم ففكرت احطه يغير على شكلي شوي ثم فكرت اختي تحطه قلتلها انتي سويه عشكل عقد براسك 

وانا بوزعه على جنب بالتسريحه بس بالاخير كلنا سويناه على شكل تاج وطلع جميل وكثير ناس عجبتهم الحركه .. عاد القصر كان فيه جسر ومويا داخل القاعه فينقاله سوالنا جو ^^

المهم قبل لااسويه احترت كيف بسويه والا اشريه من النت طيب ودي يكون طبيعي المهم بعد بحث وحوسه عرفت طريقته والشكل اللي ابغاه وطلعت على السوق (محلات الخياطه) قبل الزواج بخمس ايام عشان اخذ اغراضه اللي هي :

1 _ اعواد حديد مدري شيسمونها اللي تجي تنلف بسرعه اخذت 20 حبه  طويله يمكن متر الحبه . 

2- مجموعه ورد صناعي بالوان فستاني والوان فستان اختي اختياط اذا تورطنا بالطبيعي .

3-شرايط عشان الف فيها الاعواد الحديد وبعدها اركب الورد . 

طيب للاسف ماصورت الطريقه بس بشرحها لكم بالتفصيل :

. اخذت عود حديد واخذت فيه مقاس راسي وبرمته من ورا لين صار زي التاج

. شلته من راسي صار شكله دائري ومبروم عجنب 

.اخذ ت9 حبات من الاعواد الحديد وحطيتهم معه بنفس الطريقه وثبتهم مع بعض زين 

ركبته على شعري تاكدت ان المقاس مضبوط 

. مسكت شريطه وصمغتها عليه بحيث تخفيه بطريقه اني الفها عليه للاخير يعني لبست الاعواد الحديد 

وخليته على جنب 

. سويت واحد ثاني بنفس الطريقه بس فرق اني ركبت عليه الورد الصناعي بالصمغ احتياطا ان ماضبط الطبيعي 

جهزته قبل بفتره .

وقبل الزواج بيوم

 رحت نقيت الورد الطبيعي اللي ابغاه 

قصصت اعواد الورد وماخليت الاالورده من فوق بدون عود مدري كيف اشرحها زي اللي نحطه بالجاكوزي >>شف وين طارت 

جبت التاج اللي سويته وصمغت عليه الورد 

كان حقي 3 زهرات والباقي الابيض اللي يجي مع الورد بتشوفونه بالصور 

خلصت منه بالليل كان بكره الزواج فحطيته بصينيه بالثلاجه عشان مايذبل . 

وحطيت ورد والابيض احتياط مع صمغ المسدس اذا خرب ولاشي 

واختي سوت بالورد الصناعي طلع اجمل من الطبيعي ومرن يتحمل 

وبس 

اخليكم مع الصور 

في الاخير ان شاء الله يكون افادتكم هالتدوينه اشوفكم قريب ..^^

.

.

.

محدثتكم الغايبه عنكم من عمر تحدثكم الان وهي بكريشتها .. حامل 

وبشهري السابع ولله الحمد 

الحمل بجد حاجه جميله ويمكن الاجمل اني انتضرتها طويلا>>يبي لكم تدوينه عن انتضارها .

 , من يومي بنت واحس اشكال الحوامل حاجه  كيوت وبالذات لاحطو ايدينهم ورا ضهرهم .هنا انا اذوب 

عاد من الحماس اول الشهور لارحت عند اهلي ..

 حطيت ايدي على ضهري وانا بدون كرشه حتى ويستهبلون علي بس الحين حسيت بالم الضهر حق الحامل وصرت غصب احط ايدي على ضهري مو بكيفي عاد 

بحملي هذا ماشريت صراحه ملابس حمل مخصوص اشياء عندي حولتها لملابس حمل ماعدا كم قطعه اشتريتها مخصوصو 

بالذات ان الكرشه ماكانت باينه مرا , الشهور الجايه اضني لازم انزل نزله محترمه للسوق .

طبعا احلا شي بالنسبه لي للحامل الجلابيات الميني والفساتين الناعمه .

اكتشفت ان الملابس المشجره والمخططه عشوائيا حاجه حلوه للحامل ..

وهذا كم تنسيق ليا بشهور الحمل ال 6 اللي فاتو .. ان شاء الله تنفع الحوامل 

التنسيق الاول : 
قميص ابيض : من سيتي ماكس ب49 
 جاكيت بوي فريند من محل عادي ب150 ريال 
اكسسوار نسيت من وين قديم معي 
وتنوره قصيره سكيني :30 ريال
الشنطه : نيولوك ب85 
الهيلز : ايكونيك اضن ب70 ايام التخفيضات .

التنسيق الثاني
قميص : ب39 ريال
تنوره : قصيره مكسره جميله باللبس حللتها تفصيل نسيت كم كلفتني
الهيلز ب30 ريال
وحزام عادي نصه سلسله ونصه جلد


التنسيق الثالث
قميص من سوق بالتخفيضات على 30 كان ب150 .
تنوره سكيني سوداء قصيره .
الكلتش : نيولوك ب85
فلات اسود ماصورته والاكسسوار زي ماتشووفون
طبعا تسريحتي المعتمده البون مهما حاولت الف وارجعلها ..



بزواج صديقتي
فستان : صدقا هو مو تحت الصدر علطول تمام بس انا رفعته شوي وحطيت ذهبي مرا رفيع مايبان كثير فصار مرا جاي مع الحمل من سيتي مول ب240 ريال .
الكلتش : سبق ذكره خلاص عاد طفشتكم فيه ^^
الهيلز : من الوان مول ب30 ريال .
والاكسسوارات من محلات عاديه .
والعدسات : تراي كلر

طبعا بحملي كنت البس الكعب الوسط زي ماتشوفون خصوصا ان طلعاتي مو كثير اصلا 
الحاجه اللي غيرتها اني صرت آخذ الشنط والكلتشات الزعنطوطه قولولي ليش ؟
طيب انا خلقه مااحب الشنط الصغيره  بس دايم امي تقولي من وانا بنت تهني بالشنط الصغيره بكره تتزوجين ويجيك بزر ماعاد تشوفينها ابد فقلت يابنت تهني بس قبل لاتجي المزه ام غيارات واجد وتجبرني على الشنط الكبيره . 
وصدقا حبيتها  شكلي بتورط واتعود عليها واسحب على نقطتي .

باذن الله الموضوع متجدد كل مره راح ادخل عليه واضيف تنسيق حمل لين اجيب هالنقطه بأذن الواحد الاحد 

وفي الاخير اشوف كثير حوامل يتأزمون وقت الحمل ويضيعون باللبس بالعكس الحمل حاجه طبيعيه وبالنسبه لي قمه الاكشن لما تكونين كيوت وانتي حامل لانه سهل اي بنت تكون كيوت قبل الحمل بس بعد الحمل حاجه جميله انك تهتمين بالهكرشونه الصغيرونه وتدلعينها لانها اصلا فتره صغيره وبتروح منك فاستمتعي فيها قد ماتقدرين .

وربي يتمم على كل الحوامل ويرزق كل انثى بهاللحضات  الجميله .. دعواتكم لام كريشه تولد بالسلامه .. يسعدكم ربي ..

  .